Upplýsingtækniskólinn

Upplýsingatækniskólinn skiptist í þrjár brautir:

UPPLÝSINGA- OG FJÖLMIÐLABRAUT þar sem áherslan er á efnið sem miðla skal, form þess og útlit. Brautin tekur mið af nýjum tímum og nýrri tækni við framsetningu upplýsinga og miðlun þeirra.

Fyrstu þrjár annirnar er sameiginlegt grunnnám en að því loknu er hægt að velja milli fimm sérsviða. Það eru grafísk miðlun, bókband, prentun, ljósmyndun og nettækni. Síðan getur tekið við framhaldsnám af ýmsu tagi eða starfsþjálfun sem leiðir til fagbréfs eða sveinsprófs. Grunnnámið er 58 einingar og tekur þrjár annir, en hvert sérsvið er 21 eining. Nám í ljósmyndun hefur í tilraunaskyni verið lengt í tvær annir í skóla og í staðinn er starfsþjálfunin stytt.


TÖLVUBRAUT
Markmið tölvubrautar er að nemendur öðlist haldgóða þekkingu á flestum sviðum tölvutækninnar. Það er stefna tölvubrautarinnar að nám á brautinni taki ætíð mið af þörfum atvinnulífsins og að tölvubrautin sé ávallt í forystu í kennslu tölvufræða í íslenskum framhaldsskólum. Jafnframt er það markmið tölvubrautarinnar að nám á tölvubraut opni nemendum greiðar leiðir til starfa og/eða framhaldsnáms.

Tölvubrautin er 108 eininga nám sem skiptist í almennan sameiginlegan grunn sem áætlað er að taki fjórar annir (74 einingar) og tveggja til þriggja anna sérhæfingu (34 einingar) eftir áhuga hvers nemanda. Boðið er upp á framhaldsáfanga í eftirfarandi fagflokkum: forritun, vefsmíðum, gagnasafnsfræði, netfræði og tölvunarfræði auk lokaverkefnis sem tengist áhugasviði nemandans.


MARGMIÐLUNARSKÓLINN
Margmiðlun er heiti yfir fjölmargar starfsgreinar og starfsvið sem lúta að veraldarvefnum, kvikmyndun, hreyfimyndagerð, grafískri hönnun og fleiru. Sumar starfsgreinanna eiga sér langa sögu í atvinnulífinu eins og prentun, hönnun og kvikmyndun. Aðrar eru nýjar af nálinni og tengjast tölvuleikjagerð, þrívíddarvinnslu, viðmótshönnun og hönnun á margmiðlunarefni.

Nám í margmiðlun er fjölbreytt og starfsviðið margþætt. Námið á að veita öllum nemendum almenna þekkingu og innsýn í grundvallaratriði margmiðlunar í heild en nemendur velja sér ákveðin sérsvið á seinni stigum námsins. Skipulag námsins ætti að verða til þess að auka fjölhæfni nemenda þegar þeir hefja störf að námi loknu og auðvelda þeim að aðlagast breytingum á vinnumarkaði jafnframt því að auðvelda samvinnu milli ólíkra faghópa og starfsstétta.

Skólastjóri Upplýsingatækniskóla er Bjargey G. Gísladóttir, bgg@tskoli.is
Viðtalstímar eru í stofu 622 í Vörðuskóla (Tölvuhúsi):
Mánudaga og miðvikudaga kl. 9:00-11:00
Sími 514 9351 / 822 2336