Meistaraskólinn
Meistaraskólinn er fyrir þá sem lokið hafa sveinsprófi í löggiltum iðngreinum. Í Meistaraskólanum fer fram öflugt nám í stjórnunar- og rekstrargreinum sem miða að því að gera iðnmeistara hæfa til að sjá um kennslu nýliða og reka eigið fyrirtæki skv. 10. grein iðnaðarlaga nr. 47/1978. Markmið iðnmeistaranáms er að veita fræðslu og þjálfun þeim sem lokið hafa sveinsprófi til að stjórna verkum, kenna nýliðum fagleg vinnubrögð, öryggisreglur og iðnfræði. Staðfestingu á námi sínu hljóta meistarar með meistarabréfi sem sýslumaður í hverju umdæmi gefur út.
Þeir sem luku sveinsprófi 1. janúar 1989 eða síðar skulu ljúka iðnmeistaranámi með fullnægjandi árangri til þess að fá útgefið meistarabréf. Sótt er um meistarabréf hjá sýslumanni viðkomandi byggðarlags, framvísa þarf prófskírteini.
Skipulag hverrar iðngreinar er á síðunni Námsbrautir hér til vinstri. Nauðsynlegt er að skoða það vel áður en nemendur skrá sig á innritunarvefnum til að tryggja að áfangar séu teknir í réttri röð.
Inntökuskilyrði í iðnmeistaranám er fullgilt sveinspróf.
Ath! Umsækjendur skulu hafa almenna þekkingu í Word og Excel og æskilegt er að umsækjendur í byggingagreinum geti nýtt sér teikniforritið AutoCAD.
Kennslutilhögun
Kennsla í Meistaraskólanum fer fram í dreifnámi, þ.e. fjarnámi með staðlotum sem fara fram í húsnæði Tækniskólans á Skólavörðuholti (áður Iðnskólinn í Reykjavík). Staðlotur eru settar þannig upp að nemendur sem fylgja önnum skv. námsbraut eiga að komast í alla tíma. Ef nemandi hefur valið áfanga þvert á annir geta myndast árekstrar. Í verklegum áföngum geta verið fleiri staðlotur og á öðrum tímum. Allt námsefni, kennsluáætlun, verkefni, tilkynningar og framvinda námsins er á Námsnetinu, kennsluvef Tækniskólans.
Nám til iðnmeistara skiptist í þrjú námssvið:
- Almennt bóknám, allar eru þær val iðngreinarinnar, þ.e. kjarnagreinar.
- Stjórnunar- og rekstrargreinar, ýmist val iðngreinar eða val nemandans.
- Fagtengdar greinar, ýmist val iðngreinar eða val nemandans.
Námstími og einingafjöldi er misjafn eftir iðngreinum og ákveðinn af menntamálaráðherra. Námskrár má finna á vef menntamálaráðuneytisins en í þeim er hægt að lesa áfangalýsingarnar.
Ath! Á einstaka brautum iðnmeistara eru fagtengdir áfangar ekki í boði í Tækniskólanum, t.d. í bók-, raf-, pípulagna- og málmiðngreinum.
Ef teknar eru 18 einingar á önn er námið lánshæft samkvæmt reglum Lánasjóðs íslenskra námsmanna, LÍN.
Framhald að loknu iðnmeistaranámi í Meistaraskólanum
Formlegt samstarf er á milli Tækniskólans og VIA University College í Horsens. Nemendur geta fengið nánari upplýsingar á íslensku hjá Johan Eli Ellendersen tengilið skólans með því að senda fyrirspurn á netfangið jee@viauc.dk
Allar nánari upplýsingar um nám í Meistaraskólanum veitir Áslaug Maack Pétursdóttir á amp@tskoli.is eða í s. 514 9601.