Endurmenntunarskólinn
ENDURMENNTUNARSKÓLINN er einn af ellefu undirskólum Tækniskólans, skóla atvinnulífsins. Hlutverk Endurmenntunarskólans er að auka og efla endur- og símenntun með þarfir atvinnulífsins að leiðarljósi. Markmið skólans er að bjóða upp á viðbótar- og framhaldsnám fyrir þá sem hafa lokið stúdentsprófi eða starfstengdu námi af einhverjum toga sem og almenn námskeið sem eru opin almenningi.
Framhaldsskólum er heimilt, skv. 17. – 19. gr. framhaldsskólalaga, að bjóða upp á nám í framhaldi af skilgreindum námslokum á framhaldsskólastigi. Endurmenntunarskóli Tækniskólans býður upp á viðbótarnám í eftirtöldum greinum:
Rekstur og stjórnun í atvinnulífinu er kennd í samstarfi við Háskólann í Reykjavík. Þrjár línur eru í boði,
- útvegsrekstrarfræði til 46 ein. (ígildi 92 ECTS), innritun hér;
- flugrekstrarfræði 46 ein. (ígildi 92 ECTS), innritun hér;
- almennt nám í rekstri og stjórnun 46 ein. (ígildi 92 ECTS), innritun hér.
Nám í lýsingarfræði er fyrir þá sem vilja auka þekkingu sína á ljósinu og fræðast um samspil hönnunar, lita og ljóss, vali á lampabúnaði, notagildi lýsingar, áhrifamátt hennar á upplifun og túlkun skilaboða. Námið er 60 ein. og er kennt í dreifnámi, þ.e. á kennsluvefnum Námsnetinu og með staðarlotum í einstökum áföngum. Skipulag námsins er í endurskoðun en tekur mið af tillögum samtakanna PLDA (Professional Lighting Design Association) www.pld-a.org sem eru alþjóðleg samtök lýsingarhönnuða. Innritun hér.
Umsækjendur þurfa að hafa lokið viðeigandi starfsnámi eða stúdentsprófi. Námið hentar því vel starfsfólki úr ýmsum iðngreinum s.s., byggingariðnum, rafvirkjun / rafeindavirkjun, iðnfræði og iðnhönnun. Einnig iðnmeisturum, tækniteiknurum og sjóntækjafræðingum, starfsfólki í list- og hönnunargreinum s.s., gull- og silfursmiðum, sviðsmönnum og leikurum, ljósmyndurum og stílistum ásamt þeim sem starfa við útstillingar og auglýsingar. Námið hentar einnig nemendum í list- og hönnunarnámi, verk- og tæknifræði ásamt garðyrkju og landbúnaði.
Æskilegt er að umsækjendur hafi AutoCad forritið á valdi sínu eða leggi stund á það samhliða námi á fyrstu önn. Hægt er að skrá sig námskeið í AutoCad í Tækniskólanum.
Stök námskeið standa nemendum annarra skóla, fyrirtækjum og/eða hópum til boða. Unnt er að raða saman stökum námskeiðum að vali hvers og eins.
Nám til iðnmeistaraprófs er í umsjón Meistaraskólans. Markmið iðnmeistaranáms er að veita þeim fræðslu og þjálfun sem lokið hafa sveinsprófi svo þeir geti fengið meistarabréf skv. 10 gr. iðnaðarlaga nr. 47/1978, staðið fyrir sjálfstæðum rekstri í iðngrein sinni, stjórnað verkum og kennt nýliðum vinnubrögð, öryggisreglur og iðnfræði. Innritun hér.
Endurmenntunarskólinn býður upp á fjölda námskeiða fyrir almenning og sérhæfð námskeið fyrir starfsfólk ólíkra atvinnugreina til sjós og lands ásamt undirbúningsnámskeiðum fyrir sveinspróf í iðngreinum Tækniskólans. Námskeiðin eru styrkhæf hjá flestum fræðslusjóðum stéttarfélaga. Nánari upplýsingar um réttindi fást hjá viðkomandi stéttarfélagi.
Fræðslusjóðurinn Sjómennt er í umsjón Endurmenntunarskóla Tækniskólans. Sjómennt styrkir starfstengt nám og námskeið fyrir sjómenn sem eru félagsmenn stéttarfélaga innan Sjómannasambands Íslands. Sjómennt veitir einnig útgerðarfyrirtækjum styrki til námskeiðahalds fyrir starfsmenn sína og styrkir námsefnisgerð fyrir háseta og bátsmenn á íslenskum fiskiskipum.
Skólastjóri Endurmenntunarskólans er Áslaug Maack Pétursdóttir, netfang amp@tskoli.is